Kalima Tayyiba ke Maane

Syed Abul A'la Maududi

Part 01 - Islam me daakhil hone ki pehli shart

Aap ko maaloom hai ke insaan daaira-e-Islam mein ek kalma padh kar daakhil hota hai, aur woh kalma bhi kuch bohot zyada lamba chaura nahin hai — sirf chand lafz hain:
Laa ilaaha illallah Muhammadur Rasoolullah.

In alfaaz ko zubaan se ada karte hi aadmi kuch se kuch ho jaata hai — pehle kaafir tha, ab musalmaan ho gaya; pehle napaak tha, ab paak ho gaya; pehle Khuda ke ghazab ka mustahiq tha, ab uska pyaara ho gaya; pehle dozakh mein jaane wala tha, ab jannat ka darwaaza uske liye khul gaya.

Aur baat sirf itne hi par nahin rehti — isi kalmay ki wajah se aadmi aur aadmi mein bada farq ho jaata hai. Jo is kalmay ko padhne wale hain, woh ek ummat hote hain, aur jo is se inkaar karte hain, woh doosri ummat ban jaate hain. 

Baap agar kalma padhne wala hai aur beta is se inkaar karta hai, to goya baap, baap na raha aur beta, beta na raha. Baap ki jaidaad se betay ko wirsa (hissa) na milega; maa aur behnein tak us se parda karne lagengi.

Goya yeh kalma aisi cheez hai ke gairon ko ek doosre se mila deti hai aur apno ko ek doosre se kaat deti hai. Hatta ke is kalmay ka zor itna hai ke khoon aur rehm ke rishte bhi is ke muqaable mein kuch bhi nahin.

Glossary:

  1. Daaira-e-Islam - Islam ka circle ya boundary.
  2. Kaafir - Wo shakhs jo Islam ko nahi maanta.
  3. Musalmaan - Wo shakhs jo Islam ko maanta hai.
  4. Napaak - Ganda ya impure.
  5. Paak - Saaf ya pure.
  6. Ghazab - Boht zyada gussa.
  7. Mustahiq - Haqdaar, jo kisi cheez ka haq rakhta ho.
  8. Dozakh - Jahannum, yaani jahan saza milti hai.
  9. Jannat - Behisht, yaani swarg.
  10. Ummat - Musalmaanon ki ek community.
  11. Inkaar - Mana karna ya kisi cheez ko reject karna.
  12. Wirsa (Hissa) - Jaidaad mein milne wala part ya share.
  13. Parda - Apne aap ko kisi se chhupana ya cover karna.
  14. Khoon aur Rehm ke rishte - Khoon ke rishte jaise maa, baap, bhai, behen.

Part 02 - Itna bada farq kyu?

Ab zara is baat par gour karo ke yeh itna bada farq jo aadmi aur aadmi mein ho jaata hai, yeh aakhir kyun hota hai? Kalme mein hai kya? Sirf chand harf hi to hain — Laam, Alif, Hey, Meem, Wao, Seen aur aise hi do chaar huruf aur. In harf ko mila kar agar munh se nikaal diya to kya koi jaadu ho jaata hai ke aadmi ki kaaya palat jaaye? Aadmi aur aadmi mein kya bas itni si baat se zameen-o-aasman ka farq ho sakta hai?

Mere bhaiyon, tum zara samajh se kaam loge to tumhari aqal khud keh degi ke bs munh kholne aur zubaan hila kar chand harf bol dene ki itni badi taaseer nahi ho sakti. But-parast (Murtiyo ki puja karne wale) mushrik log to zaroor samajhte hain ke ek mantar padh dene se pahaad hil jaayega, zameen shaq ho jaayegi, aur chashme ubalne lagenge, chahe mantar ke maane ki kisi ko khabar na ho. Kyunki wo samajhte hain ke saari taaseer bas huruf mein hai — wo zubaan se nikli aur tilismat (jadu) ke darwaaze khul gaye. Magar Islam mein yeh baat nahi hai; yahan asal cheez maane hai. Alfaaz ki taaseer maano se hai. Maane agar na ho aur wo dil mein na utrein, aur unke zor se tumhare khayalat, tumhare ikhlaaq, aur tumhare aamaal na badlein, to sirf alfaaz bol dene se kuch bhi asar na hoga.

Is baat ko main ek moti si misaal se samjhaun:

Bas yahi haal Kalma Tayyiba ka hai. Faqat che-saat alfaaz bol dene se itna bada farq nahi hota ke aadmi kaafir se musalmaan ho jaaye, napaak se paak ho jaaye, mardood se mehboob ban jaaye, aur dozakhi se jannati ban jaaye. Yeh farq sirf is tarah hoga ke pehle in alfaaz ka matlab samjho aur woh matlab tumhare dil mein utar jaaye. Phir matlab ko jaan kar, samajh kar, tum in alfaaz ko zubaan se nikaalo, to tumhein achhi tarah yeh ehsaas ho ke tum apne Khuda ke saamne aur saari duniya ke saamne kitni badi baat ka iqraar kar rahe ho, aur is iqraar se tumhare upar kitni badi zimmedari aa gayi hai.

Phir yeh samajhte hue jab tumne iqraar kar liya, to uske baad tumhare khayalat par aur tumhari saari zindagi par is kalme ka qabza ho jaana chahiye. Phir tumhein apne dil-o-dimaag mein kisi aisi baat ko jagah nahi deni chahiye jo is kalme ke khilaaf ho. Phir tumhein hamesha ke liye bilkul faisla kar lena chahiye ke jo baat is kalme ke khilaaf hai, woh jhooti hai, aur yeh kalma sach hai.

Phir zindagi ke saare maamlaat mein yeh kalma tumhara haakim hona chahiye. Is kalme ka iqraar karne ke baad tum kaafiron ki tarah azaad nahi rahe ke jo chaho karo. Balke ab tum is kalme ke paaband ho; jo yeh kahe, usko karna padega, aur jis se mana kare, usko chhodna padega. Is tarah kalma padhne se aadmi musalmaan hota hai, aur is tarah kalma padhne ki wajah se aadmi aur aadmi mein itna bada farq hota hai, jiska zikr maine abhi kiya hai.

Glossary:

  1. Kalma Tayyiba (کلمہ طیبہ): Islam ka buniyadi aur sab se ahem aqeeda jo La Ilaha Illallah, Muhammadur Rasoolullah (Allah ke siwa koi maabood nahi, Muhammad ﷺ Allah ke rasool hain) ka iqraar hai.

  2. Aadmi aur Aadmi (آدمی اور آدمی): Yahan pehla "aadmi" ka matlab musalmaan, aur doosra "aadmi" ka matlab kaafir hai; dono mein zameen-o-aasman ka farq.

  3. Huruf (حروف): Harf ka matlab hota hai harf ya letter, jaise ke Laam, Alif, Meem waghera.

  4. Taaseer (تاثیر): Koi cheez ka asar ya influence, yahan alfaaz ya kalme ki asliyat par zor diya gaya hai.

  5. But-parast (بت پرست): Wo log jo buton (murtiyon) ki puja karte hain, yani mushrik log.

  6. Mushrik (مشرک): Aise log jo Allah ke siwa kisi aur ko maabood ya partner samajhte hain.

  7. Mantar (منتر): Aam tor par Hindu dharam mein isti'mal hone wale talismi alfaz jo samjhe baghair bhi padh liye jaate hain kisi cheez ke asar ke liye.

  8. Tilismat (طلسمات): Jaadu ya chamatkar jaise asraat jo kisi jaadu ya mantar se hasil kiye jaate hain.

  9. Iqraar (اقرار): Koi baat qasme kha kar ya gawai de kar qabool karna, jaise ke kalma par imaan lana.

  10. Mardood (مردود): Allah ki rehmat se door ya Allah ke nazdeek nafrat wala shakhs.

  11. Mehboob (محبوب): Allah ka pyara aur pasandeeda shakhs.

  12. Napaak se Paak (ناپاک سے پاک): Beseerat aur roohani tor par saaf hona; yahan kaafir se musalmaan banne ki haalat ka zikr hai.

  13. Aamaal (اعمال): Insaan ke amal, ikhlaaq aur rozana ke kaam jo uski zindagi ka hissa hain.

  14. Haakim (حاکم): Wo jo hukoomat kare; yahan kalme ko insaan ki zindagi par hukoomat karne wale qayde ke taur par samjha gaya hai.

  15. Zimmedari (ذمہ داری): Wo farz aur zimma jo kalma ka iqraar karne ke baad insaan par aa jaata hai.

Part 03 - Kalima Tayyiba ka matlab

Aao main batau ke Kalma ka matlab kya hai aur is ko padh kar aadmi kis cheez ka iqraar karta hai aur us ka iqraar karte hi aadmi kis cheez ka paaband ho jaata hai.

Kalma ke maane ye hain ke: Allah ke siwa koi aur Khuda nahi hai aur Hazrat Muhammad ﷺ Allah ke Rasool hain.

Kalma mein "ilah" ka jo lafz aaya hai, is ke maane "Khuda" ke hain. Khuda usko kehte hain jo maalik ho, haakim ho, khaliq ho, paalne aur posne wala ho, duaaon ka sunne aur qubool karne wala ho aur is ka mustahiq ho ke uski ibaadat ki jaaye. Ab jo tumne La ilaha illallah kaha to is ke maane ye hue ke pehle to tumne ye iqraar kiya ke ye duniya na to be-Khuda ke bani hai aur na aisa hai ke iske bohat se Khuda hon. Balke darhaqeeqat iska Khuda hai, aur wo Khuda ek hi hai aur is ek zaat ke siwa khudai kisi ki nahi hai.

Doosri baat jis ka tumne Kalma padhte hi iqraar kiya, wo ye hai ke wo ek Khuda tumhara aur saare jahaan ka maalik hai. Tum aur tumhari har cheez aur duniya ki har shai usi ki hai. Khaaliq wo hai, Raaziq wo hai, maut aur zindagi usi ki taraf se hai, museebat aur raahat bhi usi ki taraf se hai. Jo kuch kisi ko milta hai, usko dene wala haqeeqat mein wo hai aur jo kuch kisi se cheena jaata hai, uska cheen-ne wala bhi haqeeqat mein wohi hai.

Darna chahiye to us se, maangna chahiye to us se, sar jhukaana chahiye to us ke saamne. Ibaadat aur bandagi ki jaaye to uski. Uske siwa hum kisi ke banday aur gulaam nahi aur us ke siwa koi hamara Aaqa aur Haakim nahi. Hamara asal farz ye hai ke usi ka hukum maanain aur usi ke qanoon ki pairvi karein.

Glossary

  1. Kalma: Wo aqeeda jo musalman Allah aur uske Rasool ﷺ par imaan lane ke liye apni zubaan se izhaar karte hain.
  2. Maane: Matlab, meaning.
  3. Ilah: Khuda, jo sab cheezon ka haakim, maalik, aur ibadat ke laayak hai.
  4. Khuda: Allah, jo sab kuch banane, paalne, posne, sunne, aur duaa qubool karne wala hai.
  5. Maalik: Kaayenaat ka haqiqi maalik, jo har cheez par haq rakhta hai.
  6. Haakim: Hukmaran, jo hukum chalane ka haq rakhta hai.
  7. Khaliq: Banane wala, creator.
  8. Raaziq: Rizq dene wala, sustainer.
  9. Ibaadat: Allah ki bandagi, pooja karna.
  10. Museebat: Takleef, pareshani.
  11. Raahat: Sukoon, aaraam.
  12. Aaqa: Maalik, lord.
  13. Gulaam: Banda, servant.
  14. Pairvi: Itaat, follow karna.
  15. Iqraar: Tasleem karna, ikhlaas se izhaar karna ke kisi baat ko sach manna.

Part 04 - Allah Ta'ala se Ahad

Yeh ahad-o-paimaan hai jo "La Ilaha Illallah" padhte hi tum apne Khuda se karte ho aur saari duniya ko gawah bana kar karte ho.
Iski khilaf warzi karoge to tumhari zubaan, tumhare haath paon, tumhara rongta-rongta aur zameen-o-aasmaan ka zarra-zarra, jinke saamne tumne jhoota iqraar kiya, tumhare khilaf Khuda ki adaalat mein gawahi dega. Aur tum aisi be-basi ke aalam mein wahan khade hoge ke ek bhi gawah tumko safai pesh karne ke liye na milega.

Koi wakeel ya barrister wahan tumhari taraf se pairwi karne wala na hoga, balki khud wakeel sahib aur barrister sahib jo duniya ki adaalaton mein qanoon ki ulat-fer karte phirte hain, ye bhi wahan tumhari hi tarah be-basi ke aalam mein khade honge.

Woh adaalat aisi nahi hai jahan tum jhooti gawahiyan aur jaali dastawizein pesh karke aur ghalat pairwi karke bach jaoge. Duniya ki police se tum apna jurm chhupa sakte ho, Khuda ki police se nahi chhupa sakte. Duniya ki police rishwat khaa sakti hai, Khuda ki police rishwat khaane wali nahi. Duniya ke gawah jhoot bol sakte hain, Khuda ke gawah bilkul sacche hain. Duniya ke haakim be-insaafi kar sakte hain, Khuda aisa haakim nahi jo be-insaafi kare. Phir Khuda jis jail mein daalega, usse bach kar bhaagne ki bhi koi surat nahi hai.

Khuda ke saath jhoota iqraar-naama karna bohot badi be-wakoofi hai, is liye jab iqraar karte ho to khoob soch samajh kar karo aur usko poora karo. Warna tum par koi zabardasti nahi hai ke khwah makhwah zubaani hi iqraar kar lo, kyunki khaali, khuli zubaani iqraar mehz bekaar hai.

Glossary:

  1. Ahad-o-paimaan - عہد و پیمان
    Promise, covenant, or solemn agreement.

  2. La Ilaha Illallah - لا الہ الا اللہ
    There is no god but Allah (Islamic declaration of faith).

  3. Gawah - گواہ
    Witness.

  4. Khilaf warzi - خلاف ورزی
    Violation or breach.

  5. Zubaan - زبان
    Tongue or language.

  6. Haath paon - ہاتھ پاؤں
    Hands and feet.

  7. Rongta-rongta - رونگٹا رونگٹا
    Every hair on the body.

  8. Zameen-o-aasmaan - زمین و آسمان
    Earth and sky; often used to imply the entire universe.

  9. Zarra-zarra - ذرہ ذرہ
    Every particle or atom.

  10. Iqraar - اقرار
    Acknowledgment, affirmation, or declaration.

  11. Be-basi - بے بسی
    Helplessness or powerlessness.

  12. Wakeel - وکیل
    Lawyer.

  13. Barrister - بیرسٹر
    Legal advocate, especially in higher courts.

  14. Adaalat - عدالت
    Court or judiciary.

  15. Qanoon - قانون
    Law or legal system.

  16. Ulat-fer - الٹ فیر
    Manipulation or twisting (often of the law).

  17. Ghalat pairwi - غلط پیروی
    Incorrect or misleading advocacy.

  18. Jurm - جرم
    Crime or wrongdoing.

  19. Rishwat - رشوت
    Bribery.

  20. Jaali dastawizein - جالی دستاویزیں
    Fake documents or forged papers.

  21. Be-insaafi - بے انصافی
    Injustice or unfairness.

  22. Iqraar-naama - اقرار نامہ
    Declaration or statement of acknowledgment.

  23. Be-wakoofi - بے وقوفی
    Foolishness or stupidity.

  24. Zabardasti - زبردستی
    Force or compulsion.

  25. Khaali zabaani iqraar - خالی زبانی اقرار
    Mere verbal declaration, without sincerity or true intention.

  26. Mehz - محض
    Merely or solely.

Part 05 - Rasulullah ki Rahnumayi ka iqrar

La ilaha illallah kehne ke baad tum Muhammadur Rasoolullah kehte ho. Is ke maane yeh hain ke tumne yeh tasleem kar liya ke Muhammad ﷺ hi woh paigambar hain jin ke zariye se Khuda ne apna qanoon tumhare paas bheja hai.

Khuda ko apna aaqa aur shahenshah maan lene ke baad yeh maaloom hona zaroori tha ke is shahenshah ke ahkaam kya hain? Hum kaun se kaam karein jin se woh khush hota hai aur kaun se kaam na karein jin se woh naaraaz hota hai? Kis qanoon par chalne se woh humko bakhshega aur uski khilaf warzi karne par woh humko saza dega? Yeh sab baatein bataane ke liye Khuda ne Muhammad ﷺ ko apna paighambar muqarrar kiya. Aap ke zariye se apni kitaab humare paas bheji aur aap ﷺ ne Khuda ke hukum ke mutabiq zindagi basar karke humko bata diya ke musalmaanon ko is tarah zindagi basar karni chahiye.

Pas jab tumne Muhammadur Rasoolullah kaha to goya iqraar kar liya ke jo qanoon aur jo tareeqa huzoor ﷺ ne bataya hai tum usi ki pairovi karoge aur jo qanoon iske khilaf hai uspar laanat bhejoge. Yeh iqraar karne ke baad agar tumne huzoor ﷺ ke laaye hue qanoon ko chhod diya aur duniya ke qanoon ko maante rahe, to tum se badh kar jhoota aur be-imaan koi na hoga. Kyunke tum yehi iqraar karke to Islam mein daakhil hue the ke Muhammad ﷺ ka laaya hua qanoon hi haqq hai aur isi ki tum pairovi karoge. Isi iqraar ki badolat to tum musalmaan ke bhai bane, isi ki badolat tumne baap se wirasat paayi, isi ki badolat ek musalmaan aurat ya mard se tumhara nikah hua, isi ki badolat tumhari jaiz aulad bani, aur isi ki badolat tumhein yeh haq mila ke tamaam musalmaan tumhare madadgaar bane, tumhein zakaat dein, tumhari jaan-o-maal aur izzat-o-abroo ki hifazat ka zimma lein. Aur in sab ke bawajood tumne apna iqraar tod diya — is se badh kar duniya mein kaun si be-imaani ho sakti hai?

Agar tum La iIlaha illallah Muhammadur Rasoolullah ke maane jaante ho aur jaan boojh kar iska iqraar karte ho, to tumko har haal mein Khuda ke qanoon ki pairovi karni chahiye, khwah iski pairovi par majboor karne wali koi police aur adalat is duniya mein nazar na aati ho. Jo shakhs yeh samajhta hai ke Khuda ki police aur fouj aur adalat aur jail kahin maujood nahi hai, isliye uske qanoon ko todna aasaan hai, aur government ki police, fouj, adalat aur jail maujood hai, isliye uske qanoon ko todna mushkil hai — aise shakhs ke mutaliq main saaf kehta hoon ke woh La ilaha illallah Muhammadur Rasoolullah ka jhoota iqraar karta hai. Woh apne Khuda ko, saari duniya ko, tamaam musalmaanon ko, aur khud apne nafs ko dhoka deta hai.

Glossary

  1. Aaqa
    Malik ya maalik (مالک یا مالک) — Khuda ka ek laqab, jo uski baadshahat aur hukoomat ko dikhata hai.

  2. Adalat
    Court ya nyayalay (کورٹ یا عدالت) — Faisle karne aur insaaf dene ki jagah.

  3. Ahkaam
    Hukumat ke rules aur commands (حکومت کے قوانین اور احکام) — Woh hukumaat jo Khuda ne insaan ke liye beja hain.

  4. Alfaaz
    Words ya lafz (الفاظ یا لفظ) — Wo jo hum bolte hain ya likhte hain.

  5. Bakhshna
    Maaf karna, gunaah maaf kar dena (معاف کرنا، گناہ معاف کر دینا) — Khuda ka ek amal jo insaan ke gunaahon ko maaf karne se mutaliq hai.

  6. Dozakh
    Jahannam ya narak (جہنم یا نرک) — Wo jagah jahan gunaahgaron ko azaab diya jayega.

  7. Faisla
    Decision ya nirnay (فیصلہ یا نرنیہ) — Kisi baat ko tay karne ka amal.

  8. Fouj
    Army ya sena (فوج یا سینا) — Khuda ki quwwat jo insaanon ki duniavi fouj se alag hai.

  9. Iqraar
    Acceptance ya tasleem karna (اقرار یا تسلیم کرنا) — Dil se kisi baat ko maanne ka amal.

  10. Jannat
    Swarg ya heaven (جنت یا سورگ) — Wo jannat jahan nek logon ko inaam milega.

  11. Kaleja
    Heart ya dil (کلیجہ یا دل) — Pyaas ko bujhane ka ishara.

  12. Kalma Tayyiba
    La Ilaha Illallah Muhammadur Rasoolullah (لا الہ الا اللہ محمد رسول اللہ) — Islam ka ahem aur bunyadi aqeeda.

  13. Khuda
    Allah, God ya Ishwar (اللہ، گاد یا ایشور) — Islam mein wo zaat jo saari kainaat ka maalik hai.

  14. Khilaf Warzi
    Violation ya ulanghan (خلاف ورزی یا اولنگھن) — Kisi hukum ya qanoon ki nafarmaani karna.

  15. Maarfat
    Knowledge ya gyaan (معرفت یا گیان) — Allah ki pehchaan aur ilm.

  16. Muslimaan
    Ek shaks jo Islam ko maane aur La Ilaha Illallah Muhammadur Rasoolullah ka iqraar kare (مسلمان — ایک شخص جو اسلام کو مانے اور لا الہ الا اللہ محمد رسول اللہ کا اقرار کرے).

  17. Paighambar
    Nabi ya rasool (پیغمبر یا رسول) — Allah ke bheje hue wo log jo insaaniyat ko hidayat dete hain.

  18. Pairovi
    Obedience ya anusar karna (پیروی یا انسار کرنا) — Kisi tareeqa ya qanoon par chalna.

  19. Qanoon
    Law ya kanoon (قانون یا قانون) — Wo ahkaam jo Khuda ne insaan ke liye bheje.

  20. Saazish
    Conspiracy ya shadyantra (سازش یا شڈینتر) — Buri chaal ya chalein.

  21. Shahenshah
    Emperor ya samrat (شہنشاہ یا سمراٹ) — Allah ka ek laqab jo uski baadshaahat ko dikhata hai.

  22. Tasleem Karna
    Accept karna ya maanne ka amal (تسلیم کرنا یا ماننے کا عمل) — Khuda ke ahkaam ko qabool karna.

  23. Wirasat
    Inheritance ya virasat (وراثت یا وراثت) — Mulk ya maal jo kisi ke marne ke baad uske waris ko milta hai.

  24. Zakaat
    Charity ya daan (زکوة یا دان) — Wo maal jo musalmaan gareebon aur zaroorat mandon ko dete hain.

  25. Zimmedari
    Responsibility ya zimmedaari (ذمہ داری یا ذمداری) — Wo farz jo kisi par aata hai iqraar karne ke baad.

Part 06 - Ahad wa Iqrar ki ZImmedarian

Bhaiyon aur doston, abhi maine tumhare saamne Kalma Tayyiba ke maane bayaan kiye hain. Ab isi silsile mein main ek aur pehlu ki taraf tawajjo dilata hoon.

Tum iqraar karte ho ke Allah tumhara aur har cheez ka maalik hai, iske kya maane hain? Iske maane yeh hain ke tumhari jaan tumhari apni nahi, balki Khuda ki milk (mulkiyat) hai. Tumhare haath apne nahi, tumhari aankhein aur tumhare kaan aur tumhare jism ka koi bhi uzoo tumhara apna nahi. Yeh zameenein jinhein tum jote ho, yeh jaanwar jinse tum khidmat lete ho, yeh maal-o-asbaab jinse tum faida uthate ho, inmein se bhi koi cheez tumhari nahi hai. Har cheez Khuda ki milk hai aur Khuda ki taraf se atiye ke tor par tumhein mili hai. Is baat ka iqraar karne ke baad tumhein yeh kehne ka kya haq hai ke jaan meri hai? Doosre ko maalik kehna aur phir uski cheez ko apni qarar dena bilkul ek laghu baat hai.

Agar darhaqeeqat yeh baat sache dil se maante ho ke in sab cheezon ka maalik Khuda hi hai, to isse do baatein khud-bakhud tum par laazim ho jaati hain:

Ek yeh ke jab maalik Khuda hai aur usne apni mulkiyat amaanat ke tor par tumhare hawale ki hai, to jis tarah maalik kehta hai usi tarah tumhein in cheezon se kaam lena chahiye. Uski marzi ke khilaf in cheezon se kaam loge to dhoka-baazi karte ho. Tum apne in haathon aur paon ko bhi uski pasand ke khilaf hilane ka haq nahi rakhte. Tum in aankhon se bhi uski marzi ke khilaf dekhne ka kaam nahi le sakte. Tumko is peit mein bhi koi aisi cheez daalne ka haq nahi hai jo uski marzi ke khilaf ho. Tumhein in zameenon aur in jaayedadon par bhi maalik ke mansha ke khilaf koi haq hasil nahi hai. Tumhari biwiyan ya shauhar jinhein tum apne kehte ho aur tumhari aulaad jinhein tum apni kehte ho, yeh bhi sirf isliye tumhari hain ke tumhare maalik ki di hui hain. Lihaza tumko in se bhi apni khwahish ke mutabiq nahi, balki maalik ke hukum ke mutabiq hi bartaav karna chahiye.

Agar iske khilaf karoge to tumhari haisiyat ghaasib ki hogi. Jis tarah doosre ki zameen par qabza karne wale ko tum kehte ho ke wo be-imaan hai, usi tarah agar Khuda ki di hui cheezon ko tum apna samajh kar apni marzi ke mutabiq istemaal karoge, ya Khuda ke siwa kisi aur ki marzi ke mutabiq in se kaam loge, to wohi be-imaani ka ilzaam tum par bhi aayega.

Agar maalik ki marzi ke mutabiq kaam karne mein koi nuksaan hota hai to hone do. Jaan jaati hai to jaaye, haath paon toot-te hain to tootein, aulaad ka nuksaan hota hai to ho, maal-o-jaaydaad barbaad hoti hai to hone do, tumhein kyun gham ho? Jiski cheez hai agar wohi nuksaan pasand karta hai to usko haq hai.

Haan, agar maalik ki marzi ke khilaf tum kaam karo aur usmein kisi cheez ka nuksaan ho to bila-shubha tum mujrim hoge kyunki doosre ka maal tumne kharaab kiya. Tum khud apni jaan ke bhi mukhtaar nahi ho. Maalik ki marzi ke mutabiq jaan doge to maalik ka haq ada karoge, aur iske khilaf kaam karne mein jaan doge to yeh be-imaani hogi.

Glossary (Hinglish)

  1. Kalma Tayyiba - Allah ke ikhlaas se bharpoor paighaam jo imaan aur tauheed ka izhaar karta hai.
  2. Maane - Arth, matlab.
  3. Iqraar karna - Tasleem karna, maan lena.
  4. Maalik - Koi jo kisi cheez ka haqiqi malik ya adhikari ho.
  5. Milk (Mulkiyat) - Kisi cheez par haq ya adhikar rakhna.
  6. Jism - Sharir, body.
  7. Uzoo - Sharir ka hissa, jaise haath, paon, aankhein.
  8. Zameenein - Kheti ke liye ya rehne ke liye zameen.
  9. Jaanwar - Pashu, animals.
  10. Khidmat - Seva, madad lena.
  11. Maal-o-Asbaab - Sampatti, possessions.
  12. Atiya - Uphaar, gift.
  13. Iqraar - Maan lena, tasleem karna.
  14. Haq - Adhikar, right.
  15. Laghu baat - Bekaar ya be-maani baat, meaningless statement.
  16. Darhaqeeqat - Vastav mein, sach mein.
  17. Amaanat - Vishwas ke roop mein saupi gayi cheez.
  18. Hawale karna - Saumpna, handover karna.
  19. Dhoka-baazi - Dhokha dena, cheating.
  20. Pasand - Ichha, choice.
  21. Hilana - Hilaana ya chalana, move karna.
  22. Mansha - Ichha, marzi.
  23. Bartaav karna - Vyavhaar karna, behave karna.
  24. Ghaasib - Jabardasti kabza karne wala, usurper.
  25. Qabza - Kabza karna, seize karna.
  26. Be-imaan - Bhrasht, dishonest.
  27. Jaan - Jeevan, life.
  28. Mujrim - Aparadhi, criminal.
  29. Mukhtaar - Adhikar rakhne wala, in-charge.
  30. Maal - Sampatti, property.
  31. Nuksaan - Haani, loss.
  32. Aulaad - Bachche, children.
  33. Jayedad - Sampatti, property.
  34. Barbaad - Nasht karna, destroy karna.
  35. Marzi - Ichha, will.
  36. Haqiqi - Vastavik, true.

Part 07 - Islam ki Qubooliyat, Khuda par Ehsaan nhi

Dusri baat yeh hai ke maalik ne jo cheez tumhein di hai, usko agar tum maalik hi ke kaam mein sarf karte ho to kisi par ehsaan nahi karte. Na maalik par ehsaan hai aur na kisi aur par. Tumne agar uski raah mein kuch de diya ya kuch khidmat ki ya jaan de di jo tumhare nazdeek bohot badi cheez hai, tab bhi koi ehsaan kisi par nahi kiya. Zyada se zyada jo kaam tumne kiya, wo bas itna hi to hai ke maalik ka haq jo tum par tha, woh tumne ada kar diya. Yeh kaunsi aisi baat hai jis par koi phoolay aur fakhr kare aur yeh chahe ke uski tareefen ki jayein aur yeh samjhe ke usne koi bohot bada kaam kiya hai jiski badhaai tasleem ki jaye?

Yaad rakho ke saccha Musalman maalik ki raah mein kuch sarf karne ya kuch khidmat karne ke baad phoolta nahi hai, balki khaaksari ikhtiyaar karta hai. Fakhr karna kaar-e-khair ko barbaad kar deta hai. Tareef ki khwahish jisne ki aur uske khaatir koi kaar-e-khair kiya, woh Khuda ke haan kisi ajar ka mustahiq na raha kyunki usne to apne kaam ka muawza duniya hi mein maanga aur yahin usko mil bhi gaya.

Glossary (Hinglish)

  1. Maalik - Malik, adhikari, owner.
  2. Sarf karna - Kharach karna, istemal karna.
  3. Ehsaan - Upkaar, favor.
  4. Raah mein - Raste mein, Allah ki raah mein, for the sake of Allah.
  5. Khidmat - Seva, madad, service.
  6. Nazdeek - Paas, nazar mein, according to someone.
  7. Haq - Adhikar, right.
  8. Ada karna - Poora karna, nibhana, fulfill karna.
  9. Phoolna - Ghamand karna, ghuroor karna, to be proud.
  10. Fakhr karna - Garv karna, to boast.
  11. Tareef - Prashansa, praise.
  12. Badhaai - Badepan ko tasleem karna, greatness.
  13. Saccha Musalman - Wafadar aur imandaar Musalman, true Muslim.
  14. Khaaksari - Nirmaanta, vinamrata, humility.
  15. Ikhtiyaar karna - Apnana, adopt karna.
  16. Kaar-e-Khair - Achha kaam, nek kaam, good deed.
  17. Barbaad - Nasht karna, bigaad dena, destroy.
  18. Khwahish - Ichha, desire.
  19. Ajar - Inaam, reward.
  20. Mustahiq - Haqdaar, worthy.
  21. Muawza - Badla, return, compensation.
  22. Duniya - Sansar, world.
  23. Khaatir - Ke liye, for the sake of.

Part 08 - Allah ka Ehsaan aur hamara rawaiyah

Bhaiyo, apne Maalik ka ehsaan dekho ke apni cheez tumse leta hai aur phir kehta hai ke yeh cheez maine tumse khareedi hai aur iska muawza main tumhein doonga. Allahu Akbar! Is shaan aur darya-e-karam ka bhi koi thikana hai?

Quran mein irshaad hota hai: 

Inna Allaha ishtara minal mumineena anfusahum wa amwaalahum bi'anna lahumul jannah."

Haqqeeqat yeh hai ke Allah ne momino se unke jaan aur maal ko Jannat ke badle khareed liya hai.
(Surah At-Tawbah, 9:111)

Yeh to Maalik ka bartaav tumhare saath hai, ab zara apna bartaav bhi dekho. Jo cheez Maalik ne tumko di thi aur jise Maalik ne phir tumse muawza de kar khareed bhi liya, usko gairon ke haath bechte ho. Nihayat zaleel muawza le kar bechte ho aur wo Maalik ki marzi ke khilaf tumse kaam lete hain, aur tum yeh samajh kar unki khidmat karte ho ke goya raaziq wahi hain.

Tum apne dimaag bechte ho, apne haath paon bechte ho, apne jism ki taaqatein bechte ho, aur wo sab kuch bechte ho jise Khuda ke baaghi khareedna chahte hain. Is se badh kar bad-ikhlaaqi aur kya ho sakti hai?

Bechi hui cheez ko phir se bechna qanooni aur ikhlaaqi jurm hai. Duniya mein is par dagha-baazi aur fareb-dehi ka muqadma chalaya jaata hai. Kya tum samajhte ho ke Khuda ki adalat mein is par muqadma nahi chalaya jaayega?